لائق کلاں تعریفاں دے ذات تیری میرے حال تے کرم فرما یا رب

میں بھٹکیا ہویا گنگار بندہ راہ حق دی مینوں دکھا یا رب

میں مریض ہاں نفسی بیماریاں دا تو شافی ایں دے شفا یا رب

گھمن گھیر اندھیر وراؔگؔ پھسیا میری کشتی نوں پار لگا یا رب

جھتے گل نہ ہووے آداب والی ایسی مجلس تھیں مینوں بچا یا رب

ہمنشیاں نال اٹھساں بروز محشر میریاں سنگیاں نوں نیک بنا یا رب

قبر و حشر اندر جہڑا کم آوے کر نابینے نوں نور عطا یا رب

تیرے کرم نال روگ وراگؔ جاسن میرے حال تے کرم فرما یا رب

کرناں عرض پر درد غمگین ہو کے کر دے شاد دلگیر خداوندا

تیرے فضل بن کوئی نہیں ہور چارہ کیتا گردش اسیر خداوندا

تو غفور و رحیم ایں دے معافی میں آں پر تقصیر خداوندا

کرے کی تدبیراں وراگؔ عاجز تیرے ہتھ تقدیر خداوندا

میرا نامہ اعمال سیاہ سارا ایسا پر تقصیر آں خداوندا

فضل و کرم دے نال رہائی چاہناں خواہش نفس وچ اسیر آں خداوندا

تیری یاد نوں چھوڑ بے چین ہویا میں اک دل دلگیر آں خداوندا

تیرے فضل دی بھیک وراگؔ منگدا میں نادار فقیر آں خداوندا

کیتا ہوس کمینی اسیر مینوں اسدے پنجے تھیں مولا نجات چاہناں

ذکر فکر نال کردے آباد سینہ ایسی رحمتاں بھری برسات چاہناں

پڑھدا رہواں درود حضور اتے خوش خصال جہی نیک برات چاہناں

تیرے فضل نال زندگی وراگؔ گزرے کر منظور اے میری مناجات چاہناں

مقید وچ دکھاں دے دل ہویا اس قید تھیں مالک نجات چاہناں

تیری یاد اندر گزرے عمر ساری تیرا ذکر جاری دن رات چاہناں

کردے صدق و یقین عطا مینوں صبر و شکر دی نالے سوغات چاہناں

وقت نزع وراگؔ آرزو میری تیری دید تیری ملاقات چاہناں