رہساں قائم ہمیش ذبان اُتے میری طبع طبعیت پرانی رہسی

تیرے وعدے بھلاساں نہ مہربانہن تیری یاد نت یاد کرانی رہسی

تینوں چھوڑ کے گیا جے ہور پاسے کہڑے کم دی فیر ذندگانی رہسی

توں وی چھڈ مسکیؔن دے نال اڑیاں فانی دنیا ہے کدو تک جوانی رہسی

آندی یاد تے ڈاڈا دل دُکھدا ہک بے قدر نے میری رُلائی زندگی

ملیا دُکھاں سوا نہ ہور کجھ وی جھوٹی دنیا دے پچھے جلائی زندگی

اُس بے رحم دے سنگ نوں کی کرنا جس نے وچ مصیبت دے پائی زندگی

دنیا کولوں بے ذار مسکیؔن ہویا سدا رولیاں وچ نبھائی زندگی

مل جاندی شفا بیمار تائیں جیکر کرم دی کردا نگاہ دلبر

دنیا وچ ہُن نہیں سرور آندا ہو گیا تیرا دیوانہ تباہ دلبر

چنگا صلہ دیتا ای وفا بدلے ایہو تیری وفا اے واہ دلبر

رب کسے نوں نہ مسکیؔن دیوے انج بے قدرے تے لاپرواہ دلبر

دیتے نی درد جو سجن بن کے سدا یاد رہسن ایہہ جانان تیرے

مرساں جیساں ہمیش میں نال تیرے ایہو سن کجھ عہدو پیمان تیرے

اتھرو خون ایہہ حال دیوانگی دا سینہ ساڑدے پئے ارمان تیرے

رکھساں یاد مسکیؔن دن حشر توڑی قبر وچ لے جاساں احسان تیرے

ماضی نوں چھیڑ نہ مہربانی گزرے لمحے دل ڈاڈا دکھانے میرے

کسے پاسے نہ جوگی ایہہ رہی زندگی سنگ چھڈ گئے سنگی پرانے میرے

ہاسا بنیا میری بربادیاں دا بن گئے خون دے خونی بیگانے میرے

پاۓ پیار دے وچ مسکیؔن دھوکے چلو ہوش تے آ گئے ٹھکانے میرے

زخم دل دے ہوۓ نہ ٹھیک اچرے نال ہنجواں دے روز دھونا یاں میں

لُٹن والیا سب کجھ لُٹ کھڑیا کھویا اپنے خیالاں وچ ہونا یاں میں

وسدی پئ خدائ بے فکر ہو کے نہ ای سکھ سکون سنگ سونا یاں میں

نہ کوئ میرا مسکیؔن نہ کسے دا میں بہہ کے کلّا نصیباں نوں رونا یاں میں